是按呢哦

    我叫王怡婷,阮家帶佇桃園縣大溪鎮,厝內面有四个人,有阮阿爸,阿母,閣有阮阿兄。阮阿爸是一ê業務員,阿母是家庭主婦,阮阿兄和我同款是一位大學生。阮家是一个標準ê河洛家庭,在厝內和序大人講話lóng用台語來溝通,所以自細漢和我最親近ê語言就是台語。

    我在國小時,bat做過模範生和班上ê股長,升到高年級時開始代表學校去參加閩南語ê演講比賽,bat得著全鎮ê第三名。雖然無得著我家己最理想ê成績,無過嘛是因為按呢乎我開始對閩南語這個語言有興趣。國中時,我為著讀公立ê高中,所以我足認真在讀冊,無過我嘛利用我下課ê時間在學務處鬥參共,幫忙老師處理一寡代誌,因為按呢乎我有文書處理ê經驗。高中,我順利考著國立陽明高中,除了在班上擔任幹部以外嘛因為參加社團擔任學校ê司儀,定定會在學校ê典禮上聽著我ê聲音。高中時,我重開始參加閩南語ê朗讀比賽，得著全年級ê第一名,無過因為比賽ê時間和學測ê時間足倚,所以我放棄代表學校去比賽ê機會。無過,我犯勢和閩南語足有緣,大學我靠學校推薦順利進入台中教育大學ê台灣語文學系就讀,雖然一開始沒法度適應每一節課lóng用台語來上,漸漸適應了後發現台語閣有真濟我m̄知影ê所在,所以我希望會當利用我讀大學這四年好好學習,將來繼續為咱台灣ê語言、文化來打拼。